Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
El Diannu burllón
El Diannu burllón.
El Diannu burllón ou Cochino-puerco, llamáu n’Ancares, pertenez nela Mitoloxía Llïonesa,al bandu de los duendos garambainas, non malinnos, que, cunas suas gayolas, causan exasperación n’aqueillos que las reciben.
A vegadas llega a inquivoucase cul Trasgu pul sou caráuter burllón peru’l sou xeitu d’autuare puédenos dare un asomu.
Feguras comparantes d’esti ser mitolóxicu esisten en toda Uropa. Nel País Llïonés alcuentramos referencias ou rellatos del Diannu burllón nelas contornas de Los Argueyos-Llión, Ancares-Llión, El Bierciu-Llión, etc.
Aspeutu.
Yé un duendu polimórficu. Seta tresformase ne burru, vaca, ouvella ou llobu nel sou afán d’empontillare peru la sua aparencia rïal, trátase d’un ser cuna parte inferior del cuerpu d’un carneiru y la superior seméllase a un homanu, cun ourellas grandes y aguzadas y dous píquennos cuernos nela frente.
Arrodiu.
Los sous engannifos comételos afora de las viviendas homanas y cun eillos entroduzse nelas casas pa perpetrare las suas feichurías.
Caráuter.
Yé garambainas y’l sou finxu yé acucase de las bonas xentes, que cun bona fe, acóyen-ye.
Poseye un desaminéu inclín de gueyare a la muyeres esnuas.
Illustración de Mauro Sánchez
Dicen las xentes del País Llïonés que cualesquier animal desvalíu que te puedas alcuentrare, puede ser una mázcara del Diannu Burllón.