Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
Las Melusinas llïonesas
Las Melusinas llïonesas.
De craru raigannu nel nuesu imaxinariu, las Melusinas llïonesas pertenecen a esi bandu de mouras que desdeixan el sou mundu feéricu p’amestase y cumpartire la sua vida cun un homanu.
Referencias orales remanecen pur endequier nela xiugrafía del país llïonés, en llocalidaes comu Encinéu (Llión), Porto (Zamora) ou Molinillo (Salamanca) pur ponere daqué exemplu.
En dalgunos aspeutos, las Melusinas, són mouras que nos alcuerdan las sirenas de la Era Media pula sua sensualidá, guapura y venceyu acuáticu, peru comu veredes derréu poucu o na tienen que vere cun eillas.
En todas las lliendas llïonesas sobro las Melusinas apaez el miesmu esquema tripartitu:
· Alcuentru homanu cul guapu numen.
· Esistencia d’un pautu ou tabú.
· Esforciación del pautu pur parte del sere homanu emplicando la esapaeción de la moura.
Aspeutu.
La Melusina yé un sere mitolóxicu cun torsu y facia homanos y cola de sierpe comu gambas.
El sou aspeutu homanu yé mui guapín y sensual, de rubiscos y llargos cabellos.
Arrodiu.
Vive n’arrodios rurales cerque de cances fluviales, fuentes ou pouzos.
Caráuter.
En contautu cunos homanos yé una muyer dolce e incantadora.
Amuesa de moura benefautora, llucida y facedora que porta a los sous llombos una maladicha. Una vegada pur semana, el sou guapu aspeutu homanu conviértese ne Melusina. Pur esu, enantias d’acuyudase, faz prometere al sou home que una vegada pur semana premíta-ye allonxase de la llareira p’abannase sola, ensín sere gueyada.
Dicen las xentes llïonesas que’l amáu esposu cede a la retientación, frayando’l sou pautu y comu efeutu d’eillu, pérde la sua esposa pa siempres.
Illustración de Mauro Sánchez