Hora de cocineare
Estu ye pa ti que sigún qué cousas siéntante mal pul tou delicáu paratu dixestivu y p’aqueillos que yes gustaría cocineare y nun s’atreven.
Eiquí esplicarémoste cómu facere platos cenciellos, gustables y atorrantes.
Ripara esto: La cocina y las priesas nun se llavean.
Salmón cun marmalada / paparrina
Salmón cun marmalada / paparrina.
Cenciella receuta pa cocineare salmón ensín gordu añadíu.
Peru enantias remedaremos dalgunas cualidaes del ingrediente prencipal: el salmón.
Considérase-ye un pescáu azul pul sou altu conteníu ne grasa, chegando a albondare más del 10% del sou pesor en gordu, si falamos del salmón crïáu ne cautividá y alreol del 7% si ye salvaxe.
El salmón ye una fuenti de proteínas, vitamina D, yodu,manesiu, fósforu, seleniu, fierru y calciu.
Receuta de defecultá baixa.
Tiempu estimáu de preparu:10 minutos.
Ingredientes:
· Rodaxia ou llombu de salmón.
· Marmalada / Paparrina de naranxa amarga, de figos ou de cebolla.
· Meyu vasáu de Brandy.
· Sal.
N’espianta, a cocineare.
1. Sazonamos cun sal la pieza de salmón.
2. Allugamos el salmón nuna paílla y amestamos meyu vasáu de Brandy.
3. Atapamos la paílla, cocineamos a fuéu meyu-baixu.
4. Damos la torna al salmón pasaos unos minutos. Notaremos que la sua carne emprencipicia a tare daqué tersa.
5. Tornamos a da-ye la torna y amestamos un par de cuyaradas de postre de marmalada/paparrina pur riba del salmón. Atapamos.
6. Pasaos dos minutos daremos outra torna al salmón dos minutos más.
Podemos sirvire’l salmón acompangáu d’un arroz brancu ouverdura.
Bon proveitu.
Pur si nun lu sabes. Cuandu cocineamos cun cazóas ou paíllas atapadas, percanciamos, pur lláu, solecere la temperatura de coción y, desoutru, favoreceremos que los xugos los alimentos que cocineamos calténanse pur más tiempu.