Pallabras rexistradas: 30.510

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

Santa Bríxida

Santa Bríxida. De diousa celta a santa cristiana.

P’aluchare y prevenire los efeutos de las truenas, había va pa poucas décadas, nelas tierras llanas y ribeiras llïonesas, un ritual máxicu que cuadraba cuna festividá de Santa Bríxida, pa    lluchare escontra’l Renubeiru ( vere presonax en Mitoloxía llïonesa).

Las xentes llïonesas creyían que las truenas xestábanse’l primer día de Febreiru y que cul repicutiare de campanas durante la nueite podían impidire los sous efeutos. D’ehí’l refiladeru: Santa Bríxida y San Turmenteiru’l primer día de Febreiru.

La cellebración de Santa Bríxida tenía peculiaridaes sigún la llocalidá ou contorna nonde aconceyábase. Pur exemplu n’Izagre-Tierra del Esla-Llión, los mozos, dimpués d’atocare las campanas, arreábanse de bríxidos, cun roupas grotescas llevando rouca y fusu. Los habitantes del puebru al pasu de la ruidosa comitiva donaban enfusos y vino pa la posterior sosiega.

Nela contorna de Los Oteros-Llión, dimpués de tocare las campanas, la nueite del 31al 1 de Febreiru, cellebrábase una coleuta, casa pur casa, entiestáu pur un mozu, que representaba a la Santa, vestíu de vieya cun  rouca y fusu y retrucando cuna siguiente bendición: “Que Santa Bríxida te prenne los barcillares”, a toos aqueillos donantes peru si dalgún vecín fincábase las cornetas, el mozu que representaba a la santa retrucaba: “Axualá acantíense”.

Desoutra parte las ordenanzas conceyiles decraraban festivu’l dia de Santa Bríxida embaixu coima’l sou incumplimientu.

¿Quién yera Santa Bríxida?

Santa Bríxida de Kildare yé una santa copatrona, que xuntu San Patriciu, de Irlanda que vivíu ente los siegros V y VI. Yé considerada comu la primeira muyer fundadora d’una congregación femenina.

Cumparte’l sou nome cuna emportante diousa celta y una multitú de tradiciones y lliendas, lu que faz camentare que’l sou cultu yé la cristianización d’esta diousa celta.

Yé emportante sinnare que las tradiciones llïonesas qu’enrudian a Santa Bríxida tán íntimamente enradas cunas irlandesas: las coleutas efeutuadas pulos irlandeses el día de la sua cellebración invocando la sua proteición yé un exemplu d’eillu.

La conmemoración de Santa Bríxida paez nun sere causal pues el primeiru de Febreiru, los celtas paganos cellebran el “Imbolc”, fiesta dedicada a la diousa celta “Brigit”.

Image

  Illustración de Mauro Sánchez

Desconnocemos cuándu llegóu a las tierras llïonesas el cultu a Santa Bríxida manque las suas enxendras paecen sere mui antigos.