PALLABREIRU LLÏONÉS

Conserva de tomate.

Defecultá: Baixa.

Proveitare los tomates de temporada ou a un bon preciu y podere disponere d’eillos en cualesquier momentu, ye una bona oución.

Desplicámoste cómu facelu.

Ingredientes:

• Tomates maduros
• Azaite

N’espianta, a cocineare

Vamos a precisare unos botes de cristal d’un asemeyáu tamañu, nos vendrá bien a la hora del bañu maría. Si habedes guardáu dalgún bote de cristal, éstos sedrán perfeutos y, amás, sedrán de baldre.

Llavaremos los botes y sumerxirémoslos 5 minutos n’augua ferviendo  pa desinfesta-yes.

Una vegada hixienizaos sigiremos los sigientes pasos.

1.     Ponemos a fervere augua nuna cazóa grande.

2.     Cuandu fierva l’augua, entroducimos los tomates.

3.     Sabremos que tán llistos pa mondare cuandu la sua piel emprencipia a arciase.

4.     Deixaremos enfriere.

5.     Mondaremos los tomates y los trincamos.

6.     Enchenamos los botes cul tomate trincáu.

7.     Cubrimos la bouca del bote cun un regilete d’azaite.

8.     Allugamos los botes nuna cazoá cun augua, acochándolos ata la  tapa del bote.           

(Bañu maría)

9.     Fervere durante 45 minutos.

Si esta conserva de tomate ñatural la ponemos a recáu ne lláu frescu y foscu, tendremos tomate pa meses, llistu pa utilizare nos gisos y moyes.

Bon proveitu

Por si nun lu sabes

Al acochare la superficie d’un recipiente cun una película d’azaite y portalu a ellición al bañu maría, aconsegiremos soparare’l  conteníu y l’aire, favoreciendo asina la sua conservación.

Bañu maría. Esta téunica utilízase amás de la  cocina en la endustria y en llaboratorios químicos. Dizse qu’adoutóuse esti nome n’alcurdanza d’una de las primeiras alquimistas coñocidas, María d’Alexandría (siegru III dC), que lu punxu ne práutica.

Esti métodu consiste ne quetare de xeitu uniforme’l conteníu d’un recipiente sumerxiéndolu durante un tiempu n’augua ferviendo.