Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
La Santa Companna
La Santa Companna.
La Santa Companna yé’l deambulare d’aqueillos espéritos de los vivos qu’ainda nun alcontronun sosiega nel outru mundu pulos caminos nel mes de Noviembre, mes de los Santos ou de las Ánimas.
La enxendra d’esta llienda podémosla alcuentrare nela festividá celta de Samain, nela víspera del primer día del mes de Noviembre nela que sigún la tradición irlandesa, la lliende ente l’inframundu y’l mundu diluyíase y los muertos, pur unas houras, axuntábanse cunos sous descendientes y collacios.
La primeira referencia de la Santa Companna nel País Llïonés alcuentrámosla nel Autu de los desposorios de Moysen, oubra anónima escribida ne Salamanca acullá pul 1570.Posteriormente, nel siegru XVII cítase también en La Pícara Xustina.
En Galicia, La Compaña, La Güestia, n’Esturias, són desemeyantes nomes que recibe la Santa Companna nela antiga corona llïonesa.
Rellatos sobro eilla apaecen en San Ciprián d’Hermisende-Senabria-Zamora, Alixa de la Ribera-La Sobarriba-Tierras de Llión, Ancares, Los Argueyos, La Cepeda, etc.
Yé un ente mitológicu non menesterousamente malinnu.
Aspeutu.
Són espéritos de los muertos qu’ainda nun alcuentronun descansu encarnáos nelas sevas restas mortales cun desemeyantes graos de currencia sigún el tiempu de la sua defunción.
Arrodiu.
Deambulan pulos caminos en procesión al alcuentru de connocios y familiares.
Caráuter.
Són mampenas en busca de los vivos pa pidi-yes sofitu pa alcuentrare’l descansu eternu. Pa eillu solicítan-yes Misas pa salire del Purgatoiru, ou pa qu’arreparen pur eillos dalguna zana feita ne vida.
El sou alcuentru puede presaxare una muerte inminente.
Illustración de Mauro Sánchez
Dicen las xentes del País Llïonés que yé importante avitere’l contautu cuna Santa Companna y, que d’alcuentrate cun eilla, yé cunviniente trazare un círculu altou alreol pa que te protexa d’una inminente muerte y amás nun debes toca-yes nin tocare na tocáu pur eillos.