Pallabras rexistradas: 30.583

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

El Xúncanas

El Xúncanas.

Yé un númen del que mui poucu se sabe. Nelas contornas de Babia y Txaciana ontavia pervive la espresión ¡Xúncanas te cheve!.

Yé un presonax sinnestru que cuna sua aparencia bobalana atraye a los mindolos cun un únicu propósitu, afoga-yes.

Aspeutu.

Se creye que yé un diannu cun forma homana, de vieyu coitáu.

Arrodiu.

Pa facilitare la sua macabra tareya seta apaecese al pecín de pozos ou circa de pozacas, n’ú l’augua tien más fondura, pa afogare a cualesquier que s’apuxe.

Carauter.

D’aparencia pacible, bon parruquianu. Yé un despabiláu embabiecador cun una sola cousa nela sua mente: envelare y proveitare el minor descudiu p’afogare a la sua vítima.

 Image

  Illustración Mauro Sánchez

Dicen las xentes del país llïonés que si ves un vieyu desconnocíu nela veira del riéu ou al pecín d’un pouzu, vaigas cun cuidanza purque la tua vida puede tare en perigru si resulta que yé’l Xúncanas.