Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
Las meigas ou bruxas llïonesas
Las Meigas ou Bruxas llïonesas.
¿Qué tienen d’especial las meigas llïonesas? Pues que yes presta el vinu, nelas suas xuntanzas ou aquelarres nun puede faltare’l zugu la uva formentáu, y tamién, que s’esplazan alando, peru non en barradeiros sinon, convertidas en remoulinos d’aire.
Rellatos sobro las meigas nel País Llïonés hai mueitos, comu exemplu citaremos los de Villaturiel-La Sobarriba-Tierras de Llión-Llión, Acibeiros-Lubián-Zamora, Rueidemore de Riba-Senabria ou Monsagro-Salamanca.
Aspeutu.
Són seres cun una pluralidá zoomórfica diversa, pudiendo tresformase ne chitos, mixos, muros, burros, ouveyas, pitas, cabras, colombas, áligas ou n’oxetos inanimaos comu lladriellos d’adobe.
Nela sua forma homana son muyeres ensín dala carauterística sinnalada.
Arrodiu.
Los sous vezos són noturnos, esplazándose en xeitu de remoulinos d’aire.
Caráuter.
Són entes mitolóxicos malinnos que s’alimentan de la sangre de los rapazes.
Illustración de Mauro Sánchez
Dicen las xentes del País LlÏonés que naide ta quitante pulas nueites pues las meigas pueden culase nelas casas pul miesmísimu gueyu de la llavera.