Pallabras rexistradas: 30.433

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

Las Mouras filanderas

Las Mouras filanderas.

Las mouras filanderas pertenecen al fatáu de mouras costrutoras del imaxinariu llïonés. Són mouras titánicas que cuna sua fuercia tresforman el paisax.

Referencias nela toponimia del país llïonés alcuentrámoslas en Torenu (Llión) cuna llienda de la Pina la Moura, nela contorna de Lluna (Llión) cul Sierru la Mora ou n’Aldearrubia (Salamanca) ú atribúyese-ye la costrución del Teso Torrubio.

Quiciabes la moura filandera más connocida nel país llïonés seya La Griega, mui presente nelas lliendas de las ribeiras de los rieos Porma,Órbigu, Bernesga y Lluna.

La Griega yé una moura filandera que costruyíu un canal p’abastecere d’augua al sou molín valiéndose de los tarugos de la sua madrenna. Els sous céllebres versos:

Que quiera Dious

que nun quiera

ha de molere

el molín La Griega

supuxun, pula sua irreverencia, la destrución del canal,embalsada y molín costruios pur eilla.

Aspeutu.

Moura xigante, fuerte y empuitada. De meyana edá.

Arrodiu.

Magar las suas costruciones alcuéntranse arréu, la meyoría d’eillas afáyanse nelas prosimidaes de los rieos.

Caráuter.

Trabayadora y emprendeora, daqué soberbia.

 Image

  Illustración de Mauro Sánchez


Dicen las xentes llïonesas que muitos acidentes xiográficos a lu llargu del país llïonés són fruitu del afán costrutor de las mouras filanderas.