Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
El Trasgu
El Trasgu.
Nela tradición llïonesa existe la creyencia, al igual que nelos países del norouestiuropeu, d’un ser, un duendu consideráu minor, cun xeitu homanu que vive nelas casas y estabros. La sua autividá y gayola consiste n’esaspeare y acrucïare cunas suas esquetadas a los dóminos delos llares nelos que habeta.
Empuntillase nun yé tareya fácil puéis, magar ún, escamúdese de casa, el Trasgu dáselas pasigi-yes.
Nela península ibérica esisten referencias de la sua esistencia n’Esturies, Galicia, Cantabria y Pertual, asina comu nel país llïonés: Oudoyu, Cabreira, Llión, Palacios del Sil, Llión, Senabria, Zamora, etc. Y durante’l siegru XVI rexístranse referencias a los Trasgos en ciudades comu Benavente, Zamora y Salamanca.
La sua enxendra es daqué incierta: seres mitolóxicos celtas ou diouses lares romanos.
Aspeutu.
Comu duendu minor yé d’estatura piquenna, cuna manu esquierda furadada y cun ourellas aguzadas. Viste pantalones cun pernales de desemeyante color y usa gorretu encanáu.
Arrodiu.
Númen domésticu, raramente allónxase de las casas ou estabros. Présta-yes sobro tou las cocinas. La sua autividá desendólcanla siempres durante la nueite.
Caráuter.
Nun yes presta pasare desapercibios, són moquiciales y rabisqueiros. Engayóla-yes abarullalu tou magar, cuandu cánsanse de la tendelera, présta-yes acuriosare y llimpiare, cousa que pasa en contadas oucasiones.
Illustración de Mauro Sánchez
Dicen las xentes del país llïonés que’l xeitu d’esfacese d’eillos yé estramoniare granosde millu ou de cualesquier cirial pula cocina. El Trasgu al tentare atropalos cunas manos y nun percancialu pur farda de la sua manu furadada cánsanse y layan, decidiendo buscase outru lláu pa facere las suas trasgadas.