Pallabras rexistradas: 30.510

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

La vieya'l monte

La Vieya’l monte.

Nela antiguedá dalgunas fuercias de la nnatura identificábanse cun un presonax vieyu femenin. D’ehí nnacen nomes comu L’Arcu la Vieya que representaba la refraiciónde la lluz al frairare las pingas d’augua ou'l numen que tratamos eiquí: La Vieya’l monte.

La fegura mitolóxica La Vieya’l monte qu’amasia y cuez el pan pa que los pais y guelos lu lleven a los rapaces a la torna de la sua xornada nel campu ta rellacionada cuna costume de ponere a recáu y dare parte de los alimentos a los rapaces al tornare del trabayu. A la entruga enfantil: ¿Qué me traxisti?, la rimpuesta delos adultos yera: Pan la Vieya’l monte que me lu diou pa ti.

En dalgunos llugares de la xiugrafía llïonesa, la Vieya’l monte tien nome propiu:n’Acebedo-Valdeburón-Llión: Julianina, en Valdelugeros-Llión: Muyerina, o laTía o La Guela ne Riannu.

Aspeutu.

Trátase d’un presonax vieyu, reflexu de sabiduría y pacencia.

Arrodiu.

Alrodiada de nnatura y próxima a un recovecu nonde alcuéntrase el fornu pa cocere el sou pan brancu.

Caráuter.

Bona y proteutora cunos rapaces y galana cunos adultos. Connoz a tolos rapaces magar nun yes víu enxamás. Las suas connocencias de la flora y fauna que ye alrodian són proverbiales y nun yé d’estrannare ve-ye xuntu a herbívoros empastiando al pecín d’eilla ensín el minor atisbu de paúra.

 Image

   Illustración Mauro Sánchez

Pur esu las xentes del País Llïonés identifican el mitu la Vieya’l Monte, presonax dador d’agasayos a la xente minuda ne fiestas asennaladas comu’l dalgualín llïonés de Papá Noel, Santa Claus ou San Colás.