Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
La Reina Urraca, Tí Urraca ou Urraca
Reina Urraca, Tí Urraca ou Urraca.
Vaqué, de toos los nomes de las mouras llïonesas, el más enimáticu y equívocu nome seya’l Reina Urraca.
Nun entamu, el sou nome puede alcordanos los tiempos la monarquía llïonesa, peru la rïalidá y la enxendra yé outra.
El sou nome puede tenere orixen nela llingua vasca ou nuna antiga llingua enrazada cul eusquera.
Fácilmente seya un mitu raigáu ne creyencias prerromanas.
Trátase, pues, d’un numen nortennu, connocíu ne Llión y n’outros territorios del Estáu Hespannol comu Navarra, País Vascu ou Esturias.
Reina Urraca pertenez a la recua de mouras llïonesas caviernícolas, rellacionadas, tamién, cun elementos hídricos, comu costátase ne multitú d’hidrónimos de la xiugrafría del país llïonés.
El sou estatus rïal yé exercíu sobro unos territorios definios.
Las tradiciones orales de la Reina Urraca nel norete d’Hespanna enrázanla cuna diousa griega Deméter.
Aspeutu.
Yé una moura de cabellos rubiscos y terciada edá, que d’alcuerdu al sou rangu, viste ricos y guapos roupaxes. Nela sua manu ase un cetru d’ouru, símbolu de dinidá y mandu.
Arrodiu.
El sou palaciu afállase nel enterior d’una fonda cueva próxima a fuentes y cances fluviales. Nél, empáranse xoyas, piedras preciousas y monedas d’ouru que són custodiadas pur dous fieros y repotentes llïones d’ouru masizu.
Caráuter.
El sou caráuter yé discretu y seriu. Dalgunos viénun paseya-ye de nueite cerque la sua cueva, siempres sola.
Dicen las xentes llïonesas que los que ye pudun vere paseyandu afora de la sua cueva-palaciu y atreviénunse a dentrare, nun pudun burllare enxamás la vexilancia de los llïones d’ouru.
Illustración de Mauro Sánchez