Pallabras rexistradas: 30.583

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

El Cordobellu

El Cordobellu.

Los Cordobellos llamaos asina ne Llión y Esturias y Viobardos en Galicia, són seres mitolóxicos dimorfos, yé dicire, preséntanse cun dous xeitos desemeyantes: Ún homanu y outru animal.

 

Illustración del Cordobellu nel xeitu d'ave de Mauro Sánchez

 

Aspeutu.

A lu llargu la hestoria, las xentes llïonesas tresmitienun,de xeitu oral, l’aspeutu físicu, que sigún los sous antevitates, tien el Cordobellu, camudando, amestando ou suprimiendo dalgunas carauterísticas. Pur esu sigún la contorna esisten desemellanzas más ou menos remarcables de cómu imaxínanse al Cordobellu.

Nosoutros vamos a describire, de xeitu llibre, cómu creyemos que són los dous aspeutos de la sua dimorfía, comu ave y comu homanu.

Comu ave yé noturna, non aladora, de presencia meya, d’unos 25 a 30 cm, de dous kilos de pesu aproximadamente. Picu grande, triangular y gruesu. Peitu ne diversos tonos grises, que van dende’l gris pelra al gis más foscu. Llombu ne tonos gris foscu. Patas canduchas y alas fuertes, dotáu de cresta de prumas. Picotea tou xeitu de fruitos ou pibisas de la devesa de xeitu solitariu.

Dicen que si se siente amagazáu ou escomienza a espuntiare’ldía tresfórmase nun rapaz rubiscu, de gueyos manros, fuerte y mairolu. Si te dirixes a él cun cualesquier entruga nun te retruca y acontinuará merindolu nelas suas tareyas.

Arrodiu.

El sou arrodiu yé la devesa pechada pula nueite nel xeitu d’avey pradeiras cercanas durante’l día comu rapaz.

Caráuter.

Solitariu, pacíficu y musu.

 

Dicen las xentes llïonesas que si llogras pechare un Cordobellu nel sou xeitu d’ave y lu enxaulas, las bendiciones y las bonaventuras enxamás xuantarán nela tua casa.

            Illustración del Cordobellu nel sou xeitu homanu de Mauro Sánchez