Pallabras rexistradas: 30.433

Manual de Mitoloxía Llïonesa

Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.

L'home llobu

L’home llobu.

Nela fauna salvaxe, el llobu yé, quiciabes, l’animal más atarrecíu y odiáu pulos campusinos y ganadeiros llïoneses. Un temor ancestral qu’ainda ne llugares n’ú va pa dous siegros que desanicióu, ontavia sígase falando d’eillos.

La licantropía ou creyencia nela capacidá de tresformase un home ne llobu trespasa los lliendes del país llïonés y tien los sous raigames nela antiguedá clásica. Alcuentramos el mitu de los homes llobos nelas illas británicas cunos “werewolves”, n’Alemania cunos “werwölfen”, en Francia cunos “loup-garous”, en Pertual y Galicia cul “lobishome” ou’l “guizotso” vascu ou los “llobos-meigos” esturianos.

Nun entamu estos seres nun poseyían un caráuter menesterousamente maléficu pues tan solu yeran vítimas bobalanas d’una fada, peru, endeiquí del siegru XV, fou convirtiéndose nun ser feroche, devorador de pastoriasy presonas.

Nel país llïonés tenemos la primeira referencia escribida del home llobu nela oubra “Opúsculos y doctrinas prácticas”, de Pedro de Calatayud nel siegru XVII, n’ú rellátase la cerracina de ganáu y pastores nelos alreoles de Vilafranca d’El Bierciu pul home llobu.

Aspeutu.

En dalgunas contornas del País Llïonés dicen habere víu al home llobu cubríu cuna piel de llobu, cun garfas comu manos y unos atarrecibles caneiros nela bouca.

Arrodiu.

Vive incultu ne cerecinas y devesas, saliendo a los caminos ou praos ou baixando a los puebros pa devorare a las suas vítimas.

Caráuter.

Voraz,violentu y solitariu.

 Image

   Illustración de Mauro Sánchez

Dicen las xentes del País Llïonés que cualesquier puede convertise nun home llobu pur una fada allagal ou pur sere’l séutimu fillu home arréu, como camientan nela Sierrade la Culiebra-Zamora pur un periodu de siete annos.