Manual de Mitoloxía Llïonesa
Tentamos dare un breve repasu al imaxinariu tradicional llïonés ensín tratare d’aprofundare nin pescudiare nela sua enxendra. Describiremos cun desenfadu cómu yé físicamente y comentaremos n’ú s’esengulve, el sou caráuter y atitú.
La mitoloxía llïonesa de perfil propiu y llariegu yé fruitu l’asimilación y evolución los imaxinarios indouropeos que las xentes llïonesas fuenun tresmitiendo durante siegros. Pur esu nun yé d’estrannare alcuentrare similitues cun personaxes mitolóxicos griegos, exipcios, persas, etc.
Ca presonax portará cunsiéu un lligazón cun tolu que queremos discontate.
Esperamos que te descobra la nuesa riquísima Mitoloxía Llïonesa.
Bibliografía: El imaginario tradicional leonés. Nicolás Bartolomé Pérez, Mitoloxía popular del Reinu de Llión. Nicolás Bartolomé Pérez, Mitos y supersticiones. José A. Balboa de Paz.
El Basiliscu nel país llIonés.
El Basiliscu.
La enxendra d’esta bestia mitolóxica piérdese nel tiempu. La sua esistencia connozse nelas culturas griegas y exipcias, pasando posteriormente a la uropa ocidental,aquedándose nela cultura popular norocidental de la península ibérica, Llión, Esturias, Galicia y norete de Pertual,territorios toos eillos , pertenecientes a la antiga corona llïonesa.
¿Cuál yé la sua enxendra, d’ú procede’l Basiliscu?. El sou orixe varía sigún las contornas.En dalgunos lláos, el Basiliscu, nnaz de cabellos femeninos cayíos nel augua,comu acontez en Gordón ou Oumanna (Llión); peru quiciabes, la enxendra más común seya d’un guevu de gallu*, una vegada ca siete annos comu nel desaniciáu puebru de Salio (Llión) ou Salamanca. Pur esu hai’l vezu dacachinare a los gallos enantias los siete annos d’edá.
Representaciones de Basiliscos podémoslas alcuentrare escantilladas nelas siellerías de los coros de las catedrales d’Estorga yLlión.
*Dalgunas pitas pueden sufrire una patoloxía nel ovariu esquierdu, l’únicu funcional. Nesti casu, l’ovariu dreitu desendólcase xererando andróxenos, lu que provoca que la pita medre cun un aspeutu y carauterísticas de gallu.
Aspeutu.
Trátase d’un sere mitolóxicu cun tiesta y meyu cuerpu d’ave y cola de sierpe. La sua tiesta tá coronada pur una dobre cresta.
Gueyos penetrantes, de gueyada asesina,picu fuerte del qu’emana un enieldu mortoriu que calcina.
Cuerpu recubiertu de prumas amariellas cuasi córneas, nnaciendo del sou estremu una llarga y canducha cola de sierpe.
Patas fuertes comu garfas.
Arrodiu.
Magar la sua nnacencia pueda producise ne corrales ou ne meyos acuáticos sigún las contornas, el feitu yé que’n cualesquier lláu puedes alcuentrate un Basiliscu.
Caráuter.
Sere maléficu, que cuna sua gueyada acachina magar nun ye gueyes y que pur ú pasa deixa un rastrión de desolación y destrución.
Illustración de Mauro Sánchez
Dicen las xentes llïonesas que solu esisten dos xeitos d’estrangallase del Basiliscu. Fuliminando’l tutu, que craramente deseméyase de los demás pul sou minor tamannu, ou pul ataque d’una mustadiella, únicu sere vivu cabalente d’acachinalu magar el preciu a pagare seya la sua propia muerte.